Avropa kuboklarının püşkü atıldı

Lent.az-ın məlumatına görə, püşk nəticəsində Azərbaycanın qadınlardan ibarət “İqtisadçı” klubunun CEV Kuboku, “Bakı” və “Lokomotiv” komandalarının isə Çağırış Kubokunda rəqibləri müəyyənləşib. “İqtisadçı” 1/16 finalda “Dinamo Romprest” (Rumıniya) klubu ilə üz-üzə gələcək. İlk oyunlar 29 noyabr - 1 dekabrda, cavab matçları isə 6 – 8 dekabrda olacaq. Cütün qalibi 1/8 finalda “Yamamay” (İtaliya) – “Lö Kanne” (Fransa) görüşünün qalibi ilə qarşılaşacaq. Bu dəfə onlar 10 – 12 yanvar və 17 – 19 yanvarda oynayacaq.

Çağırış Kubokundakı təmsilçilərimizdən “Bakı” mübarizəyə I raunddan başlayacaq. Paytaxtın eyniadlı klubunun ilk rəqibi “Aruji “Anortosis” (Kipr) olacaq. Görüşlər 8-9 oktyabr və 15 – 16 oktyabrda baş tutacaq. Cütün qalibi II raunda “Evrö” (Fransa) ilə üz-üzə gələcək. Oyunlar 29 noyabr – 1 dekabr və 6 – 8 dekabrda olacaq.

“Lokomotiv” isə mübarizəyə II raunddan başlayacaq. Komandamız “Vasas Hofeka Obuda” (Macarıstan) ilə görüşəcək.