“Bakı”nın maraqlandığı daha 3 əcnəbi məlum oldu

Lent.az-ın məlumatına görə, paytaxtın eyniadlı təmsilçisi “Xəzər Lənkəran”dan ayrılan Uinston Parksı Rumıniya “Timişoara”sından transfer edib.

30 yaşlı hücumçu bu gün Bakıya gələrək rəsmi müqaviləyə imza atacaq. Onunla 2 illik anlaşmanın əldə olunacağı gözlənilir.

“Bakı”nın əcnəbi transferləri bununla yekunlaşmayacaq. Hazırda komandanın baş məşqçisi Aleksandr Starkovun istəyinə əsasən 3 pribaltikalı futbolçu ilə danışıqlar aparılır. Bunlar litvalı yarımmüdafiəçi Edqaras Çesnauskis və latviyalı müdafiəçi Denis İvanovla hücumçu Maris Verpakovskidir. Artıq onlara klubun müqavilə şərtləri çatdırılıb.

Qeyd edək ki, 27 yaşlı Edqaras Çesnauskis müqavilə üzrə Rusiyanın Rostov, eyni yaşda olan Denis İvanov Türkiyənin “Sivasspor”, 32 yaşlı Maris Verpakovski isə Ukraynanın “Dinamo” (Kiyev) klubuna məxsusdur. Onların hər üçü öz ölkələrinin milli komandalarının üzvüdürlər.