“Barselona”nın prezidenti “Milan”ı hədələdi

Lent.az-ın məlumatına görə, Rossel İtaliya “Milan”ından Zlatan İbrahimoviçin 2010-2011-ci il mövsümündə icarəyə götürülməsi qarşılığında vəsaiti kataloniyalıların hesabına köçürməsini istəyib.

Əks halda o, “rossonyerlər”in Çempionlar Liqasından kənarlaşdırıla biləcəyini söyləyib: “İbrahimoviçin transferi üçün vəsaiti “Milan” dərhal ödəməyə başlamalıdır. Buna heç bir şübhə yoxdur. Əks halda, onlar Çempionlar Liqasından xaric edilə bilərlər”.

Qeyd edək ki, Zlatan İbrahimoviç “Barselona”ya məxsusdur. Lakin o, ötən mövsüm “Milan”da icarədə olub. İtaliya klubu futbolçunun transfer hüququnu 24 milyon avroya almaq hüququna malikdir. “Rossonyerlər”in rəhbərliyi İbrahimoviçdən gələcəkdə də yararlanmaq niyyətində olduğunu açıqlayıb. Lakin oyunçunun keçidi üçün vəsait hələ də “Barsa”nın hesabına keçirilməyib.