“Neftçi” darmadağın etdi, Arif Əsədov hamıdan razı qaldı

Çempionlar Liqasına hazırlıq məqsədilə Türkiyənin İsparta şəhərində keçirdiyi təlim-məşq toplanışı çərçivəsində “Neftçi” yoldaşlıq oyununa çıxıb. Lent.az-ın məlumatına görə, Azərbaycan çempionu Ukraynanın "Metallurq" (Zaporojye) klubu ilə qarşılaşıb.

Görüş komandamızın tam üstünlüyü şəraitində keçib. Nəticədə flaqman rəqibini darmadağın edib – 3:0. Hesabı 5-ci dəqiqədə Rəşad Abdullayev açıb. Onun yerinə yetirdiyi cərimə zərbəsi qarşısında "Metallurq"un qapıçısı aciz qalıb. 21-ci dəqiqədə Flavinyo hesab arasındakı fərqi artırıb. İkinci hissədə də fəal oyun nümayiş etdirən “Neftçi” Ukrayna təmsilçisini daha bir dəfə cəzalandırıb. Oyunda son nöqtəni müdafiəçi Denis Silva qoyub.

Türkiyəli hakimlərin idarə etdiyi matçda hesab daha böyük ola bilərmiş. Lakin yerli hakimlər bir neçə epizodda “Metallurq”un qapısına 11 metrlik cərimə zərbəsi təyin etməyiblər. Digər təhlükəli hücumlar zamanı Bahodir Nasimov və Flavinyonun zərbələrini ukraynalıların qapıçısı dəf edib.

Flaqmanın baş məşqçisi Arif Əsədov klubun rəsmi saytına açıqlamasında oyundan razı qaldığını bildirib: “Oyun çox maraqlı keçdi. Bu görüşdə heyətdəki bütün 22 futbolçuya şans verdim. Cavan futbolçularımızdan Elvin Yunusov və Kərim Diniyev ukraynalılara qarşı forma geyindi. Birinci hissədə qapını Saşa Stamenkoviç, ikinci hissədə isə Rauf Mehdiyev qorudu. Hər iki qapıçının çıxışı məni razı saldı. Ümumiyyətlə, oyundan razı qaldım”.

Qeyd edək ki, “Neftçi” Türkiyədəki təlim-məşq toplanışını iyunun 22-də başa çatdıracaq.