Olimpiya çempionlarına qarşı

İyunun 17-də Almaniyanın Hamburq şəhərində akademik avarçəkmə üzrə Dünya Kubokunun II mərhələsi start götürəcək. Lent.az-ın məlumatına görə, üç gün davam edəcək nüfuzlu yarışda Azərbaycanı bir kişi, bir qadın avarçəkən təmsil edəcək.

Onlar 27 – 29 mayda Münhen şəhərində keçirilmiş I mərhələdə komanda yoldaşlarına nəzərən daha yaxşı nəticə göstərmiş Aleksandr Aleksandrovla Nataliya Mustafayevadır. Aleksandrov kişilər, Mustafayeva isə qadınlar arasında 1 nəfərlik qayıqla mübarizə aparacaq. Avarçəkənlərimiz 2000 metr məsafəyə yürüşlərə qatılacaqlar. Bir aya yaxındır ki, Almaniyada təlim-məşq toplantısında olan təmsilçilərimiz çalışmalarını get-gedə intensivləşdirirlər. Milli komandamızın baş məşqçisi Rudiger Hauffenin sözlərinə görə, qarşıdakı yarşda məqsəd daha yaxşı nəticələr göstərməkdən ibarətdir.

38 ölkənin 500-dən çox idmançısının qatılacağı Dünya Kubokunun I mərhələsində Aleksandr Aleksandrov və Nataliya Mustafayeva ciddi rəqabətlə üzləşəcəklər. 2010-cu ildə 23 yaşadək akademik avarçəkənlərin dünya çempionatında gümüş medal qazanmış Aleksandrovun rəqibləri arasında kişilər arasında dünya çempionu, çexiyalı Andrey Sinek, Dünya Kubokunun I mərhələsinin qalibi, yeni zelandiyalı Mahe Drizdeyl, 2008-ci il Pekin Yay Olimpiya Oyunlarının qalibi, norveçli Olaf Tufte kimi idmançılar var. Mustafayeva isə keçmiş dünya və olimpiya çempionu, belaruslu Yekaterina Karstenə rəqib olacaq.

Qeyd edək ki, Dünya Kubokunun I mərhələsində 5 idmançımız mübarizə aparıb. Onlardan həm Aleksandr Aleksandrov, həm də Nataliya Mustafayeva 11-ci yeri tutub. Kamal Məmmədov 1 nəfərlik yüngül çəkili qayıqla 13-cü, Cavid Əfəndiyev – İqor Xmara dueti 2 nəfərlik qoşa avarlı yüngül çəkili qayıqla yürüşdə 21-ci olub.