Mariya Stadnik daha bir turnirin qalibi oldu
14 avqust 2009 10:00 (UTC +04:00)

Mariya Stadnik daha bir turnirin qalibi oldu

Avqustun 13-də Polşanın paytaxtı Varşavada sərbəst və qadın güləşi üzrə sayca 18-ci “Ziolkovski” və 13-cü “Varşava Kuboku” beynəlxalq turnirlərinə start verilib.


Azərbaycan Güləş Federasiyasının mətbuat xidmətindən Lent.az-a verilən məlumata görə, ilk yarış günündə kişi sərbəst güləşçilər 55, 66 və 96, qadınlar isə 48, 55, 63 və 72 kq çəki dərəcələrində qalibləri müəyyənləşdiriblər.

“Varşava Kuboku” beynəlxalq turnirində iştirak edən qadın yığmamızın lideri, 48 kq çəki dərəcəsində yarışan Mariya Stadnik keçirdiyi bütün görüşləri qələbə ilə başa vuraraq turnirin qalibi olub. Mübarizəyə 1/4 finaldan qoşulan Stadnik əvvəlcə finlandiyalı Savola Sarianı, daha sonra ukraynalı Lüdmila Baluşkanı, finalda isə rusiyalı Larisa Orjakı məğlubiyyətə uğradaraq fəxri kürsün ən yüksək pilləsinə qalxıb.

55 kq-dakı təmsilçimiz Yuliya Radkeviç isə Polşanın 2 nümayəndəsi Margena Oroşko və Malqorjata Krujanı məğlub etdikdən sonra yarımfinalda rusiyalı 3 qat Avropa çempionu Natalya Qoltsa uduzub. 3-cü yer uğrunda görüşdə isə Yuliya italiyalı Valentina Minqutsiyə məğlub olaraq turniri 5-ci pillədə başa vurub.

63 və 72 kq çəkilərdəki təmsilçilərimiz Olesya Zamula və Dina İvanova daha erkən mərhələlərdə məğlub olaraq mükafatçılar sırasına düşə bilməyiblər. İvanova 9-cu, Zamula isə 14-cü yeri tutub.
# 700

Oxşar yazılar