Sergey Bezuqlıy – Maksim Prokopenko duetinin finaldakı bütün rəqibləri müəyyənləşib

Polşanın Poznan şəhərində keçirilən dünya çempionatında 1000 metr məsafəyə 2 nəfərlik kanoe qayığı (C-2) ilə yürüşdə bütün finalçılar müəyyənləşib.

Seçmə mərhələni hamıdan öndə qət edən Sergey Bezuqlıy və Maksim Prokopenkodan ibarət azərbaycanlı duet həlledici yürüşdə Belarus, Rusiya, Polşa, Kanada, Kuba, Rumıniya, Macarıstan və Ukraynadan olan cütlüklərlə mübarizə aparacaq.

Seçmə mərhələ yürüşlərində kanoeçi duetimizdən əlavə, Andrey Baqdanoviç – Aleksandr Baqdanoviç (Belarus) və Aleksey Korovaşkov – İlya Pervuxin (Rusiya) cütlükləri 1-ci yeri tutaraq, birbaşa əsas finala yüksəliblər. Yarımfinal yürüşlərində isə daha 6 finalçı müəyyənləşib. Bunlar Pavel Skovronski – Martsin Qrjibovski (Polşa), Endryu Russell – Qabriel Boşezn-Sevinyi (Kanada), Reydel Ramos Avila – Sergey Torres Madriqal (Kuba), Alexandru Dumitresku – Viktor Mixalaki (Rumıniya), Marton Tot – Robert Mayk (Macarıstan) və Dmitri Sirik – Vadim Tsıpan (Ukrayna) duetləridir.

Hazırkı dünya çempionatında Bezuqlıy – Prokopenko dueti həm seçmə, həm də yarımfinal mərhələ yürüşlərinin iştirakçıları arasında ən yüksək nəticəni göstərib. Təmsilçilərimiz 1000 metr məsafəni 3 dəqiqə 34 saniyə 98 mikrosaniyəyə qət ediblər. Kanoeçilərimiz avqustun 21-də Bakı vaxtı ilə saat 14:10-da başlanacaq final yürüşündə 4-cü zolaqda yarışacaqlar.

Qeyd edək ki, 1000 metr məsafəyə yürüş 2 nəfərlik kanoe qayıqları üçün olimpiya məsafəsi sayılır. Sergey Bezuqlıy – Maksim Prokopenko dueti ən yaxşı nailiyyətlərini məhz bu məsafəyə yürüşlərdə əldə ediblər. Onlar 2 – 4 iyulda İspaniyanın Trasona şəhərində keçirilmiş Avropa çempionatında qızıl, ötən il Kanadanın Dartmut şəhərində təşkil olunmuş dünya çempionatında isə gümüş medal qazanmaqla, 2012-ci il London Yay Olimpiya Oyunlarında layiqincə çıxış etməyə qadir olduqlarını nümayiş etdiriblər.

Bezuqlıy – Prokopenko dueti hazırda davam edən dünya çempionatında 500 metr və 200 metr məsafələrə yürüşlərdə də çıxış edəcək.