Vitali Kliçkonun növbəti rəqibi açıqlandı

Ümumdünya Boks Şurasının (WBO) versiyası üzrə dünya çempionu Vitali Kliçkonun növbəti rəqibi müəyyənləşib.

Lent.az-ın “Bild”ə istinadən verdiyi məlumata görə, ukraynalı peşəkar boksçu Ümumdünya Boks Təşkilatının (WBO) versiyası üzrə sabiq dünya çempionu Şennon Briqqslə (ABŞ) üz-üzə gələcək.

Döyüş oktyabrın 16-da Almaniyanın Hamburq şəhərindəki “O2 World Arena”da keçiriləcək. Görüş barədə rəsmi açıqlama yaxın günlərdə veriləcək. Bilet satışına isə avqustun 31-də başlanılacaq. Döyüş öncəsi Vitali Kliçko Şennon Briqqsi çox güclü rəqib və ən təsirli zərbələrin sahibi kimi təqdim edib. 38 yaşlı amerikalı isə ukraynalı rəqibini pensiyaya göndərəcəyinə söz verib.

Qeyd edək ki, Şennon Briqqs 2006-cı ildə WBO versiyası üzrə dünya çempionu olub. Bundan bir il sonra o, çempionluq titulunu rusiyalı Sultan İbrahimova uduzub. Briqqs ümumilikdə peşəkar rinqdə 58 döyüşə çıxıb, 45-i nokautla olmaqla, 51 qələbə qazanıb, 5 məğlubiyyət alıb, 1 görüşü heç-heçə ilə nəticələnib, 1-i isə baş tutmamış sayılıb. Vitali Kliçko isə peşəkar karyerası ərzində 42 döyüş keçirib, 38-i nokautla olmaqla, 40-nı qazanıb və 2-ni uduzub. O, sonuncu dəfə titulunu mayda polşalı Albert Sosnovski ilə qarşılaşmada müdafiə edib.