Azərbaycan nümayəndə heyətinə olimpiadada mobil telefonlar hədiyyə olunub

Sinqapurda keçirilən Yeniyetmələrin I Yay Olimpiya Oyunlarında 205 ölkənin nümayəndə heyətinin hər bir üzvünə pulsuz mobil telefon və şəbəkə daxilində istənilən qədər danışıq imkanı olan nömrələr paylanıb. Bu haqda Lent.az-a hazırda olimpiadada iştirak edən Milli Olimpiya Komitəsinin üzvü, tanınmış jurnalist Elnur Əşrəfoğlu bildirib.

Onun sözlərinə görə, “Samsung” markalı telefonlar bu şirkətin özü tərəfindən hədiyyə verilib. Nümayəndə heyətinin üzvləri “Singtell”in nömrələri ilə eyni mərkəzdən bir-biriləri ilə əlaqə saxlaya bilərlər.

Əşrəfoğlu bu halın olimpiadalar tarixində ilk dəfə baş verdiyini söyləyib: “Mən 2000-ci il Sidney Yay Olimpiya Oyunlarından etibarən bütün olimpiadalarda iştirak etmişəm. İlk dəfədir ki, belə halla rastlaşıram”.

Qeyd edək ki, 2008-ci il Pekin Yay Olimpiya Oyunlarında Azərbaycan nümayəndə heyəti “Azercell”in hədiyyə etdiyi rouminq və 1000 manatlıq danışıq imkanı olan nömrələrdən yararlanıb.

Elşən Məmmədov