Vaqif Cavadov “Qarabağ”a qayıtmaqdan imtina etdi

Azərbaycan milli komandasının və Hollandiyanın “Tvente” klubunun futbolçusu Vaqif Cavadov Avropa Liqasının “pley-off” mərhələsində Almaniyanın “Borussiya” (Dortmund) komandası ilə görüşlərdə “Qarabağ”a kömək etməyə razılıq verməyib.

Lent.az-ın əldə etdiyi məlumata görə, Ağdam klubu rəhbərliyinin Cavadovla apardığı danışıqlar müsbət nəticə verməyib. 21 yaşlı hücumameylli yarımmüdafiəçi ilə maliyyə məsələsində razılığın əldə olunmadığı bildirilir.

Atası Füzuli Cavadov da Lent.az-a açıqlamasında Vaqif Cavadovun “Borussiya” ilə ilk matçda oynamayacağını təsdiqləyib. Lakin o, avqustun 19-da Dortmundda təşkil olunacaq qarşılaşmayadək texniki məsələlərin həllini tapa bilməyəcəyini səbəb göstərib: “İlk oyuna cəmi 3 gün vaxt qalıb. Bu müddətdə Azərbaycan və Hollandiya klubları arasında danışıqlar aparılmalı, razılıq əldə olunmalı, Vaqif “Qarabağ”la müqavilə bağlamalı və adı UEFA-ya sifariş olunmalıdır. Bütün bu məsələlərin həlli üçün isə vaxt azdır. Oğlumun “Qarabağ”a keçməyə razılıq verməməsindən isə xəbərim yoxdur”.

Hazırda Almaniyanın Dortmund şəhərində olan “Qarabağ”ın baş direktoru Əmrah Çəlikəl də Vaqif Cavadovun “Borussiya” ilə ilk matçda Ağdam komandasına kömək etmə ehtimalının xeyli az olduğunu bildirib. Çəlikəl Lent.az-a açıqlamasında hələ “Tvente” rəhbərliyi ilə danışıqların aparılmadığını, futbolçunun özünün isə Hollandiyada olduğunu diqqətə çatdırıb. Onun sözlərinə görə, Cavadovla cavab oyunu öncəsi Bakıda danışıqlar aparılacaq: “Mən Vaqifin “Qarabağ”a qayıtmaqdan imtina etdiyinə inanmıram. Bununla belə, hər şey onun özündən asılıdır. Oynamağa razılıq versə, söhbət edəcəyik. Milli komandanın avqustun 23-dən 26-dək Bakıda keçirəcəyi təlim-məşq toplantısı ilə əlaqədar Cavadov paytaxtımıza gəlməlidir. Həmin vaxt onunla görüşüb-danışacağıq. Razılıq versə, cavab görüşündə iştirak edə bilər”.

Amma Vaqif Cavadov Avropa Liqasının “pley-off” mərhələsində oynamaq üçün avqustun 19-da keçiriləcək ilk matçadək “Qarabağ”ın futbolçusu kimi UEFA-ya sifariş olunmalıdır. Çəlikəl bu məsələnin də hələ həllini tapmadığını açıqlayıb.

Qeyd edək ki, “Borussiya” ilə “Qarabağ” arasındakı ilk oyun Bakı vaxtı ilə saat 00:05-də başlanacaq. Ağdam klubu artıq Dortmunddadır. Komandamız səfərdə ilk məşqini Bakı vaxtı ilə saat 21:00-da keçəcək.

Elşən Məmmədov