Tanış olun: “Borussiya” Dortmund

“Qarabağ” klubunun UEFA Liqasındakı növbəti rəqibi ilə tanışlıq

Ballspiel-Verein Borussia və ya qısaca “Borussiya” (Dortmund). Lent.az-ın məlumatına görə, 101 yaşlı alman klubu 23 yaşlı “Qarabağ”ın UEFA Liqasındakı növbəti rəqibidir. Bu yazı ilə “Qarabağ atlarının” final mərhələsi yolundakı son maneəsi – Almaniyanın Dortmund şəhərinin “Borussiya” klubu ilə tanış olacağıq. Beləliklə:

Tam adı: Ballspiel-Verein Borussia
Rəngləri: sarı-qara
Qurulma tarixi: 19 dekabr 1909
Stadionu: Signal İduna Park
Azarkeş tutumu: 80 min 552
Prezident: Raykard Raubal
Baş məşqçi: Yürgen Klopp
Rəsmi saytı: www.bvb.de

“Borussiya” 6 dəfə Almaniya çempionatı olan “Bundesliqa”da çempion olub (1956, 1957, 1963, 1995, 1996, 2002). 2 dəfə (1965 və 1989-cu illərdə) Almaniya kubokunu alıb. 1966-cı ildə isə UEFA Kuboklar Kubokunu alıb. Ən böyük uğuru 1997-ci ildə Çempionlar Liqasının qalibi olmağıdır.

Stadionu Signal İduna Park (keçmiş Westfalenstadion) Almaniyadakı ən böyük stadiondur.

“Borussiya” 2009-2010 mövsümündə “Bundesliqa”nı 5-ci pillədə başa vurub.

Klubun aparıcı oyunçularından biri türkiyəli yarım müdafiəçi Nuri Şahindir. Hücumçuları paraqvaylı Nelson Valdez və misirli Muhammed Zidan da rəqibləri qorxuda biləcək oyunçulardır. Əslən Braziliyadan olan və təzəlikcə Almaniyanın da vətəndaşlığını qəbul etmiş Dede də ən tanınan futbolçulardandır. Klubun kapitanı alman Sebastyan Köldür.

Vüqar Baba