Milli komandanın baş məşqçisi 6 aylıq cəzaya məruz qaldı

Lent.az-ın “France Presse” agentliyinə istinadən verdiyi məlumata görə, buna 2010-cu il dünya çempionatı ərəfəsində baş verən insident səbəb olub.

Həmin vaxt Keyruşun komitə nümayəndələrini təhqir etdiyi bildirilir. Lakin münaqişənin təfərrüatları açıqlanmır. Yalnız o məlumdur ki, mayda Portuqaliya Antidopinq Komitəsinin əməkdaşları bir neçə futbolçudan dopinq nümunəsi götürmək üçün milli komandanın məşq bazasına gəliblər. Məhz həmin vaxt baş məşqçi onlarla kobud davranıb.

Portuqaliya Futbol Federasiyası (FPF) məşq bazasındakı insidentlə bağlı Keyruşu bir ay müddətinə cəza və 1000 avro cəriməyə məruz qoyub. Lakin Antidopinq Komitəsi baş məşqçinin diskvalifikasiya məsələsinə ayrıca baxmaq niyyətində olduğunu açıqlayıb. Keyruşun özü isə günahını rədd edir. Baş məşqçinin fikrincə, FPF-in vitse-prezidenti Amandio de Karvalyo, sadəcə, onun istefasına nail olmaq istəyir. 57 yaşlı mütəxəssis diskvalifikasiyası ilə bağlı qərardan apellyasiya verəcəyini bildirib.

Qeyd edək ki, FPF-in qərarına əsasən, Karluş Keyruş 2012-ci il Avropa çempionatının seçmə qrup mərhələsi çərçivəsində sentyabrın 3-də Kipr, sentyabrın 7-də isə Norveçlə nəzərdə tutulan matçlarda Portuqaliya millisinə rəhbərlik etməyəcək. Onun səlahiyyətlərini köməkçilərindən biri yerinə yetirəcək. Baş məşqçi 6 aylıq diskvalifikasiyasının ləğvinə nail ola bilməsə, oktyabrda Danimarka və İslandiya ilə görüşləri də buraxmalı olacaq.