AFFA “Xəzər-Lənkəran”dan qorxdu

AFFA-nın Apellyasiya və Ekspert Komissiyası (AEK) “Xəzər-Lənkəran” klubuna qarşı İntizam Komitəsi tərəfindən tətbiq edilən cəzanın icrasını müvəqqəti dayandırıb.

Lent.az-ın qurumun rəsmi saytına istinadən verdiyi məlumata görə, tərəflərə Lənkəran şəhərində klub tərəfindən növbəti rəsmi oyun keçirilənə qədər baş sponsor “Unibank”ın bannerlərinin yerləşdirilməsi barədə razılığa gəlinməsi təklif olunub.

İntizam Komitəsinin “Xəzər Lənkəran”la bağlı qəbul etdiyi qərara Lənkəran şəhərində klub tərəfindən növbəti rəsmi oyun keçiriləndən sonra baxılacaq.

Qeyd edək ki, “Xəzər-Lənkəran” klubu Lənkəran şəhər mərkəzi stadionunda keçirdiyi oyunlarda Unibank Premyer Liqasının baş sponsorunun reklam bannerini yerləşdirməkdən imtina edib. İntizam Komitəsinin xəbərdarlığına məhəl qoymayan klub rəhbərliyi 2000 manat cərimələndikdən sonra AEK-ə şikayət edib.