ŞOK! AFFA milli komandanın fəaliyyətini dayandırdı

Lent.az-ın qurumun rəsmi saytına istinadən verdiyi məlumata görə, bu addım dünya çempionatının Avropa zonası üzrə qrup mərhələsində yığmamızın çıxışlarını başa vurmasından sonra atılıb.

AFFA qərara alıb ki, ölkəmizdə qadın futbolunun inkişafını sağlam təməl üzərində qurmaq və yeni futbolçu nəslinin yetişdirilməsi məqsədilə qadınlardan ibarət milli komandanın Avropa və dünya çempionatlarının seçmə mərhələlərində iştirakı müvəqqəti olaraq dayandırılsın. Bununla bağlı AFFA-nın saytında yerləşdirilən məlumatda ölkəmizdə qadın futbolunda son illər baş verən qalmaqallara toxunulub. Ölkə çempionatının 2007-ci ildə baş verən qalmaqal üzündən ləğvi, 19 yaşlılardan ibarət millimizin heyətində 6 “lipa”nın çıxış etməsi, bu səbəbdən, həmin komandanın 2011-ci ilədək bütün yarışlardan kənarlaşdırılması xatırlanıb.

Bununla yanaşı, əsas yığmamız seçmə oyunlarda biabırçı çıxış edərək, 4 səfər matçında qapısından 54 top buraxıb.

Qeyd edək ki, 2012-ci ildə 17 yaşadək qızlar arasında dünya çempionatı Bakıda keçiriləcək. Bu məqsədlə indidən almaniyalı mütəxəssis Sissi Raytın rəhbərliyi altında 15 yaşlılardan ibarət yeni milli komandanın formalaşdırılmasına başlanılıb.