“Xəzər Lənkəran”ın stadionunun ot örtüyü öz-özünə düzələcək
24 avqust 2010 13:00 (UTC +04:00)

“Xəzər Lənkəran”ın stadionunun ot örtüyü öz-özünə düzələcək

“Xəzər Lənkəran” futbol klubunun ev oyunlarını keçirdiyi Lənkəran şəhər mərkəzi stadionu yaxın vaxtlarda təmirə bağlanmayacaq. Bu haqda Lent.az-a stadionun direktoru Höccət Hacıyev məlumat verib.


Onun sözlərinə görə, meydançanın ot örtüyünün arzuolunan vəziyyətdən uzaq olması yayda havaların əlverişsiz keçməsi ilə əlaqədardır: “Meydançamızın ot örtüyü Danimarka və Hollandiyadan gətirilən toxumlardan formalaşıb. Lənkəran subtropik iqlim qurşağında yerləşdiyi üçün rütubətli hava şəraiti meydançanın vəziyyətinə təsirsiz ötüşməyib. Amma təqribən 20 gündən sonra ot örtüyü qaydasına düşəcək”.


Hacıyev bildirib ki, “Xəzər Lənkəran” komandası yalnız oyunlarını stadionda keçirir. Məşqlər isə başqa meydançada reallaşdırılır. Əsas stadionun imkanlarından qonaq komanda oyuna bir gün qalmış yararlanır.


Qeyd edək ki, Lənkəran şəhər mərkəzi stadionu ot örtüyünün əlverişsiz vəziyyətə düşməsi üzündən indiyədək bir neçə dəfə təmirə bağlanılıb. Beynəlxalq oyunların keçirilməsinə də icazə alan meydançanın hazırkı vəziyyəti ürəkaçan deyil. Unibank Premyer Liqasının III turunda “Xəzər Lənkəran”la “İnter” arasındakı matçdan sonra qonaq komandanın baş məşqçisi Kaxaber Tsxadadze meydançanın ot örtüyündən şikayətlənib.
# 1379

Oxşar yazılar