Yeni doğulmuş körpəni sünnət edənə cinayət işi AÇILDI

Çelyabinsk vilayətində yeni doğulmuş körpənin evdə sünnət olunması ilə bağlı cinayət işi açılıb.

Lent.az Rusiya mediasına istinadla bildirir ki, təqsirləndirilən şəxs tanışının xahişi ilə yeni doğulmuş uşağa evdə sünnət xidməti göstərməyə gəlib. Bu zaman o, keyidici dərmanın dozasını aşıb. Nəticədə körpə huşunu itirib və nəfəsi kəsilib.

Qeyd olunur ki, bundan sonra körpə tibb müəssisəsinə aparılıb, ona “anafilaktik şok, həddindən artıq doza” diaqnozu qoyulub və vaxtında yardım göstərilib.

Bildirilir ki, Maqnitoqorsk şəhərinin Leninski rayon prokurorluğu yerli sakinə qarşı cinayət işi üzrə ittiham aktını təsdiqləyib. İş mahiyyəti üzrə əlavə baxılması üçün məhkəməyə göndərilib. Prokurorluq açıqlayıb ki, kişi Rusiya Federasiyası Cinayət Məcəlləsinin 238-ci maddəsinin 2-ci hissəsinin “b” və “c” bəndlərində (“təhlükəsizliyə cavab verməyən işlərin görülməsi və ya xidmətlərin göstərilməsi”) nəzərdə tutulmuş cinayət törətməkdə ittiham olunur. Buna görə onu 500 min rubla qədər cərimə tətbiq etməklə 6 ilə qədər həbs cəzası gözləyir.