5 otaqlı ev yandı, heyvanlar və quşlar xilas edildi

Bərdə rayonu, Saatlı kəndində yanğın hadisəsi baş verib. Lent.az-ın Fövqəladə Hallar Nazirliyinin saytına istinadən verdiyi xəbərə görə, hadisə zamanı vətəndaşa məxsus ümumi sahəsi 154 kv.m olan kürsülü birmərtəbəli 5 otaqlı evin iki otağının tavanı 62 kv.m sahədə və dam örtüyünün yanar konstruksiyaları 80 kv.m sahədə yanıb. Evin qalan hissəsi yanğından mühafizə olunub. Yanğın saat 03:21-də yanğınsöndürənlər tərəfindən söndürülüb.

Füzuli rayonunda da oxşar hadisə baş verib. Bala Bəhmənli kəndində vətəndaşa məxsus ümumi sahəsi 9 kv.m olan toyuq hininin yanar konstruksiyaları yanıb. Yanğın zamanı hində olan 11 ədəd ev quşu yanğınsöndürənlər tərəfindən xilas olunub. Yaxınlıqdakı tikililər yanğından mühafizə olunub. Yanğın saat 05:20-də yanğınsöndürənlər tərəfindən söndürülüb.

Daşkəsən rayonunun Zinzahal kəndində isə ümumi sahəsi 96 kv.m olan tövlənin dam örtüyünün və içərisində olan arakəsmələrin yanar konstruksiyaları yanıb. Yanğın zamanı tövlədə olan 8 baş iribuynuzlu və 12 baş xırdadırnaqlı heyvan yanğınsöndürənlər tərəfindən xilas edilib. Yaxınlıqda olan tikililər yanğından mühafizə olunub. Yanğın saat 05:35-də yanğınsöndürənlər tərəfindən söndürülüb.