Sərnişin qatarı yük maşını ilə toqquşdu, yaralalılar var - YENİLƏNİB

Dəmir Yolu Nəqliyyatında Polis İdarəsinin Sabunçu Xətt Polis Bölməsindən APA-ya faktı təsdiqləyiblər. Növbətçi hissədən qəza nəticəsində bir nəfərin xəsarət aldığı və hadisə yerində qəzanın səbəblərinin araşdırıldığı bildirilib. Hadisənin digər təfərrüatları barədə hələlik məlumat verilmir.

3 saylı Şəhər Klinik Xəstəxanasından APA-ya verilən məlumata görə, qəza nəticəsində bir nəfər - 1969-cu il təvəllüdlü Quliyev Habil Mikayıl oğlu xəstəxananın reanimasiya şöbəsinə daxil olub. Yaralının vəziyyəti ağır qiymətləndirilir. Onun ağır baş-beyin və digər qapalı sınıq xəsarətləri aldığı bildirilir. Xəstəxananın reanimasiya şöbəsindən həmçinin bildiriblər ki, xəstənin ağır baş-beyin xəsarəti alması səbəbindən o Neyrocərrahiyə xəstəxanasına göndərilib.

Hadisə yerində aidiyyatı qurumlar cəlb olunub. Polis hadisə yerində araşdırma aparır. Qəzanın fəsadlarının aradan qaldırılması istiqamətində tədbirlər görülür.

***

01.40

Bu gün axşam saat 23.00 radələrində Bakıda sərnişin qatar yük maşını ilə toqquşub.

APA-nın xəbərinə görə, hadisə Pirşağı-Kürdəxanı xəttinin 29-cu kilometrində baş verib.

Belə ki, Bakıdan Moskvaya hərəkət edən qatarı yolu keçən “Kamaz” markalı yük maşını ilə toqquşub.

Sabunçu rayon Polis İdarəsindən APA-ya faktı təsdiqləyiblər. Polis hadisə yerində araşdırma apardığı üçün hadisənin təfərrüatlarının hələ bəlli olmadığını deyib.

3 saylı Şəhər Klinik Xəstəxanasından APA-ya verilən məlumata görə, qəza nəticəsində bir nəfər xəstəxananın reanimasiya şöbəsinə daxil olub. Yaralının vəziyyəti orta-ağır qiymətləndirilir.

Məlumata görə, hadisə nəticəsində qatarın maşinisti və köməkçisi, həmçinin “Kamaz”ın sürücüsü xəsarət alıb. Onlar 3 saylı Şəhər Klinik Xəstəxanasının müxtəlif şöbələrinə yerləşdiriliblər.

Hələlik onun şəxsiyyətini dəqiqləşdirmək mümkün olmayıb.