Əli Həsənov: “Heydər Əliyev Azərbaycan xalqının övladı olsa da…”

“Heydər Əliyev Azərbaycan xalqının övladı olsa da, dünya siyasətinə önəmli töhfələr vermiş, bəşəri nüfuz qazanmış bir lider olub”. Lent.az-ın verdiyi məlumata görə, bunu bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Heydər Əliyevin 90 illik yubileyi ilə əlaqədar elan etdiyi beynəlxalq yazı müsabiqəsi qaliblərinin mükafatlandırma mərasimində Prezident Administrasiyasının İctimai-siyasi şöbəsinin müdiri Əli Həsənov söyləyib.

Əli Həsənov deyib ki, bütün Avrasiya regionunu əhatə edən dövlətlərin jurnalistləri Heydər Əliyevin fəaliyyətini, bu liderin xalqına və bölgə xalqlarına verdiyi dəyərləri qiymətləndirirlər: “Heydər Əliyevin 20-ci əsrin sonlarında, 21-ci əsrin əvvəllərində Qərblə Şərq arasında sosial-iqtisadi, mədəni körpülərin salınması sahəsində bəşəri fəaliyyət göstərib. Heydər Əliyevin irsi təkcə bizim xalqın deyil, dünya siyasətşünaslarının, jurnalistlərinin tədqiqat obyektinə çevriləcək. Biz bu gün artıq bunu görürük”.

Əli Həsənov vurğulayıb ki, Heydər Əliyevin lider keyfiyyəti dünya siyasətşünaslığının dəyərlərinə çevrilib.