Bakıda müəllim və valideynlər aksiya keçirir - YENİLƏNİB

Pişəvəri adına Humanitar Fənlər Gimnaziyasında 1-5-cı siniflərin ləğv olunması müəllimlər və valideynlər tərəfdən narazılıqla qarşılanıb.

Humanitar Fənlər Gimnaziyasından Lent.az-a verilən məlumata görə, təhsil naziri Mikayıl Cabbarovun qərarına əsasən, gimnaziyada ibtidai siniflər ləğv olunacaq. İbtidai siniflərin ləğv olunması 16 müəllimin ixtisara düşməsi ilə nəticələnəcək. Bu isə müəllimlər və valideynlər arasında narazılıq yaradıb və valideynlər narazılıqlarını ifadə etmək üçün bu gün gimnaziyanın qarşısına toplaşıblar.

Təhsil Nazirliyinin QHT və KİV-lərlə iş sektorunun müdiri Cəsarət Valehov isə Lent.az-a açıqlamasında bildirib ki, istedadlı uşaqların təhsilinin daha təkmil təşkil olunması üçün Pişəvəri adına gimnaziyanın strukturunda müəyyən dəyişiklər olacaq . Bu, ona xidmət edir ki, 5-ci sinifdən başlayaraq bu uşaqlarla daha mükəmməl iş qurulacaq: “Valideynlərin və ya müəllimlərin mənafeyinə toxunan səbəb və narahatçılığa əsas yoxdur. Hazırda TN-nin nümayəndəsi məktəbdədir, müəllim və valideynlərlə müzakirələr aparır”.