Bakıda “Mercedes” yandı, hərəkət iflic oldu - VİDEO - YENİLƏNİB

Sosial şəbəkələrdə sentyabrın 25-də Binəqədi rayonu ərazisində Bakı-Quba yolunun 7-ci kilometrliyində avtomobil yanması hadisəsinə yanğınsöndürənlərin cəlb olunmaması barədə həqiqətə uyğun olmayan məlumatlar yayılıb.

Bu barədə Lent.az-a Fövqəladə hallar Nazirliyinin (FHN) mətbuat xidmətindən bildirilib. Məlumatda qeyd olunur ki, bu gün saat 14:55-də FHN-in “112” qaynar telefon xəttinə Binəqədi rayonu ərazisində Bakı-Quba yolunun 7-ci kilometrliyində avtomobildə yanğın baş verməsi barədə məlumat daxil olub. Dövlət Yanğından Mühafizə Xidmətinin müvafiq qüvvələri saat 15:00-da (daxil olmuş zəngdən 5 dəqiqə sonra) hadisə yerinə çataraq yanğının mühərrik bölməsindən avtomobilin digər hissələrinə keçməsinin qarşısını alıb və 15:05 radələrində yanğın tam söndürülüb. Hadisə nəticəsində 1993-cü il təvəllüdlü Məmmədov Elxan İsmayıl oğluna məxsus “Mercedes” markalı 50-CK-141 dövlət qeydiyyat nişanlı minik avtomobilinin mühərrik hissəsi yanıb, digər hissələr isə yanğından mühafizə olunub: “Əlavə olunmuş müşahidə kameralarından götürülmüş kadrlardan da göründüyü kimi, yanğın FHN-in hadisə yerinə vaxtında çatmış yanğınsöndürənləri tərəfindən operativ olaraq söndürülüb. Odur ki, bir daha sosial şəbəkə istifadəçilərindən xahiş edirik ki, həqiqətə uyğun olmayan bu kimi məlumatlara deyil, nazirliyin rəsmi saytı vasitəsilə yayılan təsdiqlənmiş məlumatlara istinad edilsin”.

***

15:16

Bakı Beynəlxalq Avtovağzal Kompleksinin yaxınlığında Məmmədov Elxana məxsus 50- CK-141 dövlət qeydiyyat nişanlı “Mercedes” markalı avtomobil yanmağa başlayıb. Lent.az-ın məlumatına görə, cihazlar lövhəsində nasazlıq işığının yandığını görən sürücü dərhal avtomobili yolun kənarında saxlayıb. Hadisə yerinə Binəqədi Rayonu Yol Polis Şöbəsinin və FHN Dövlət Yanğından Mühafizə Xidmətinin əməkdaşları cəlb olunub. Görülən tədbirlər nəticəsində avtomobil söndürülüb. Avtomobilin yanması ilə bağlı yolda nəqliyyatın fəaliyyətində çətinliklər yaranıb. Lent.az hadisə ilə bağlı görüntüləri təqdim edir:

Qeyd edək ki, Fövqəladə Hallar Nazirliyi hadisə ilə bağlı bəyanat yayıb:

"Bakı şəhərinin Binəqədi rayonunda "Mercedes" markalı minik avtomobilinin mühərrik hissəsi yanıb. Avtomobilin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb".