Azərbaycan Gürcüstan vasitəsilə neft ixracını artırıb

Azərbaycan Dövlət Neft Şirkətinin (ARDNŞ) Marketinq və iqtisadi əməliyyatlar İdarəsi iyun ayında Novorossiysk limanından (Qara dəniz, Rusiya) 169 437 ton, Supsa limanından (Qara dəniz, Gürcüstan) 242 325 ton, Ceyhan limanından (Aralıq dənizi, Türkiyə) 1 742 490 ton xam neft ixrac edib.

Bu barədə «APA-Economics»ə ARDNŞ-in mətbuat xidmətindən məlumat verilib.

Ötən ilin eyni dövrü ilə müqayisədə Novorossiysk limanından xam neft ixracı 2,90%, Supsa limanından 3 dəfə, Ceyhan limanından isə 7,66% artıb.

Məlumatda bildirilir ki, ümumilikdə, yanvar-iyun ayları ərzində Novorossiysk limanından 825 317 ton, Supsa limanından 1 364 679 ton, Ceyhan limanından isə 10 135 240 ton xam neft ixrac edilib. Keçən ilin analoji dövrü ilə müqayisədə Novorossiysk limanından xam neft ixracı 16,25% azalıb, Supsadan 5,26% artıb, Ceyhan limanından isə 2,09% azalıb.

Qeyd edək ki, ARDNŞ-in Marketinq və iqtisadi əməliyyatlar İdarəsi tərəfindən ixrac olunmuş xam neftin göstəriciləri həm Azərbaycan dövlətinə, həm də ARDNŞ-ə məxsus xam neft həcmlərini əks etdirir.