Bakıda ağır qəza: ölən və yaralananlar var - YENİLƏNİB

Bakıda ağır qəza: ölən və yaralananlar var

Aprelin 30-na keçən gecə Bakı şəhərinin Nizami rayonu ərazisində ağır yol qəzası baş verib. Lent.az-ın məlumatına görə, Babək prospektində 90 EE 188 nömrə nişanlı “Hyundai”, “Opel” və 90 XS 116 nömrəli digər “Hyundai” toqquşub. Nəticədə “Hyundai” markalı avtomobillərin hər ikisinin sürücüsü ağır xəsarət alıb. Sürücülərdən 65 yaşlı Salman Qədirov xəstəxanaya aparılarkən yolda keçinib.

Faktla bağlı Nizami RPİ-də cinayət işi açılıb.

*****

01:21

Bakının Nizami rayonunda yol qəzası baş verib.

APA-nın məlumatına görə, Babək prospektində üç nəqliyyat vasitəsi - iki "Hyundai" və bir "Opel" markalı avtomobillər toqquşub. Məlumata görə, qəza şəraitini "Hyundai Sonata" markalı minik maşını yaradıb. Həmin avtomobil Kamran Əfkari küçəsindən gəlib və sürücü Babək prospektinə dönmək istəyib. Lakin düzgün manevr etmədiyi üçün Babək prospekti ilə şəhər mərkəzindən "Xalqlar Dostluğu" dairəsi istiqamətində hərəkətdə olan digər "Hyundai" markalı minik maşınının yoluna çıxıb və toqquşma baş verib. Arxadan gələn "Opel" markalı avtomaşın da toqquşan avtomobillərə çırpılıb. Qəza nəticəsində "Hyundai" markalı hər iki avtomobilin sürücüləri xəsarət alıblar. Onlar təcili tibbi yardım briqadası tərəfindən xəstəxanaya aparılıb.

Yol qəzasını Nizami Rayon Polis İdarəsi araşdırır.