Qızı ilə "patı" satan ata TUTULDU - FOTO

Xudatda narkotik vasitələrin qanunsuz dövriyyəsi ilə məşğul olan şəbəkə aşkarlanıb.

Daxili İşlər Nazirliyinin mətbuat xidmətinin Quba regional qrupundan Lent.az-a verilən məlumata görə, Xaçmaz rayon Polis Şöbəsinin Xudat Polis Bölməsinin əməkdaşları tərəfindən narkotik vasitələrin qanunsuz dövriyyəsinə qarşı əməliyyat keçirilib.

Polis əməkdaşlarının keçirdikləri əməliyyat-axtarış tədbiri nəticəsində Xudat şəhər sakinləri Marat Mirzəyev, Samir Mirzəyev, Reyhan Mirzəyeva, Murad Qazıyev və Asif Abdullayev saxlanılıblar. Saxlanılan zaman onların üzərindən hazır bükümlərdə psixotrop maddə olan metamfetamin (patı) və narkotk vasitə olan heroin aşkar olunaraq götürülüb.

Daha sonra isə əməliyyatçılar həmin şəxslərin yaşadıqları mənzillərə baxış keçiriblər. Evə baxış zamanı oradan əlavə olaraq metamfetamin və heroin aşkar olunaraq götürülüb.

Faktla bağlı Cinayət Məcəlləsinin müvafiq maddələri ilə cinayət işi başlanılıb, əməliyyat-axtarış tədbirləri davam etdirilir.

Qeyd edək ki, saxlanılan şəxslər arasında Reyhan Mirzəyeva Marat Mirzəyevin qızıdır.