BNA ilə bağlı daha bir QALMAQAL: Yol polisinin saxladığı maşına cərimə yazdı

Bakıda yol polisi tərəfindən saxlanılan minik maşınını Bakı Nəqliyyat Agentliyi cərimələyib.

Lent.az xəbər verir ki, bu barədə sosial şəbəkələrdə paylaşılan fotolar izləyicilərin həm gülüş, həm də qınaq hədəfinə çevrilib.

Belə ki, paytaxtın mərkəzi küçələrinin birində yol hərəkəti qaydalarını pozduğu üçün yol patrul xidməti əməkdaşı “Mercedes” markalı avtomobilə “saxla” əmri verib. Əmrə tabe olan sürücü avtomobili yolun sağında saxlayıb. Bu zaman isə ona BNA tərəfindən dayanma-durma qaydalarını pozması ilə bağlı cərimə tərtib olunub.

Məsələ ilə bağlı BNA mətbuat katibi Mais Ağayev Lent.az-a sözügedən cərimə ilə bağlı məlumatlı olduqlarını bildirib:

“Sosial şəbəkələrdə yayılan həmin cərimə ilə bağlı məlumatlıyıq. Tənbeh protokolunun necə tərtib olunması barədə BNA tərəfindən araşdırma aparılıb. Nəticə etibarilə vətəndaşa yazılan cəriməyə xitam verilməsi qərara alınıb”.