Bakıdan Naxçıvana gedən yük maşınından görün nələr çıxdı?

İrandan Naxçıvana qanunsuz yük aparan sürücü saxlanılıb.

Bu barədə Lent.az-a Naxçıvan Baş Gömrük İdarəsindən bildirilib.

Məlumata görə, Azərbaycan vətəndaşının idarə etdiyi 99DK173/10ZG554 dövlət qeydiyyat nişanlı “DAF” markalı yük maşını Bakıdan Naxçıvana gətirəcəyi 18 tona yaxın avtomobil ehtiyyat hissələrini İranda boşaldıb. Həmin yükün yerinə 17 tondan artıq döşəmə daşı yükləyib. Bu barədə Əməliyyat və İstintaq İdarəsinə məlumat daxil olub.

Nəqliyyat vasitəsi mayın 29-da saat 21:50-də Azərbaycan Respublikasının “Biləsuvar” dövlət sərhədindən buraxılış məntəqəsində qeydiyyata alınaraq ölkədən çıxış edib, iyunun 2-də saat 04:52-də “Culfa” dövlət sərhədindən buraxılış məntəqəsindən muxtar respublika ərazisinə daxil olub.

Yükə qanunsuz müdaxilə zamanı istifadə olunan yapışdırıcı və digər vasitələr, qırılıb sonradan yapışdırılmış gömrük təminatları maddi sübut kimi götürülüb.

Faktla bağlı araşdırma aparılır.