Azərbaycanlı tələbədən rüşvət alan dosentlər HƏBS OLUNDU

Rusiyada Sankt-Peterburq Tibb Universitetinin iki müəllimi rüşvət üstündə həbs edilib.

Lent.az yerli mediaya istinadla bildirir ki, 10 ölkədən 20-yə yaxın tələbə dindirilmək üçün İstintaq Komitəsinə gətirilib.

Məlumata görə, həbslər Sankt-Peterburq Dövlət Pediatriya Tibb Universitetində həyata keçirilib. Saxlanılan ilk şəxs 29 yaşlı Türkmənistan vətəndaşı Azizbek Madaminov olub.

O, rüşvətxorluqda vasitəçi olmaqda şübhəli bilinir. Əzizbek kəsiri olan tələbələrdən rüşvət almaqda ittiham olunur. Aprelin 17-də 24 yaşlı Səudiyyə Ərəbistanı vətəndaşı da analoji cinayət törətdiyinə görə saxlanılıb. Hər iki şəxs həbs edilib.

Aprelin 21-də təhlükəsizlik qüvvələri universitetin iki müəllimini saxlayıb: anatomiya kafedrasının 49 yaşlı dosenti İvan Dimov və farmakologiya kafedrasının 40 yaşlı dosenti Nikanor Lavrov. Müəllimlərə qarşı rüşvətxorluğa görə cinayət işi açılıb.

Bir həftə sonra rüşvət işi ilə bağlı 18 tələbə istintaq şöbəsinə gətirilib. Onların arasında 6 Rusiya vətəndaşı ilə yanaşı, İran, İordaniya, Azərbaycan, Qana, Türkmənistan, İsrail, Gürcüstan və Özbəkistan vətəndaşları da var. Hələlik onlar şahid statusundadırlar.