Azərbaycanlı çobanın Ermənistana keçdiyi iddia olunur - YENİLƏNİB

Dövlət Sərhəd Xidməti (DSX) azərbaycanlı çobanın sərhədi keçərək Ermənistan ərazisinə daxil olması barədə yayılan məlumatlara münasibət bildirib.

Lent.az-ın məlumatına görə, DSX-dən Modern.az-a bildirilib ki, qurumun xidməti ərazisində belə hadisə baş verməyib.

***

12:11

Azərbaycanlı çobanın Ermənistan sərhədini keçdiyi iddia olunur.

Lent.az Ermənistan mediasına istinadla bildirir ki, iddialara əsasən, Azərbaycan vətəndaşı saxlanılıb və hazırda Berd şəhərindəki hərbi polisdə saxlanılır.

Ermənistan Müdafiə Nazirliyi məsələ ilə bağlı hələlik açıqlama verməyib.

Tavuş vilayətinin icma rəhbərlərindən biri nəşrə açıqlamasında hadisə barədə eşitdiyini, lakin dəqiq məlumata malik olmadığını bildirib.

“O, rayonumuzun meşələrindən keçərək gəlib”, – deyə icma rəhbəri qeyd edib.

Ermənistan Milli Təhlükəsizlik Xidmətindən isə bildirilib ki, hazırda hadisə ilə bağlı məlumatları yoxdur.

Digər icma rəhbəri isə azərbaycanlı çobanın Aygedzor ərazisindən sərhədi keçdiyini və hazırda hərbi polisdə saxlanıldığını iddia edib.

Onun sözlərinə görə, hadisə zamanı hava dumanlı və yağışlı olsa da, çobanın sərhədi könüllü keçərək siyasi sığınacaq istəməsi ehtimalı da irəli sürülür.

Qeyd edək ki, məlumat hələlik rəsmi şəkildə təsdiqlənməyib.