32 nəfər şaurmadan ZƏHƏRLƏNDİ

Moskvada 32 nəfər şaurmadan zəhərlənib, onlardan 28-i xəstəxanadadır.

Lent.az Rusiya KİV-ə istinadla xəbər verir ki, faktla bağlı cinayət işi başlanıb.

“Avqustun 20-dən 24-dək olan müddətdə qida zəhərlənməsi əlamətləri ilə 32 nəfər tibbi yardım üçün müraciət edib. Müəyyən edilib ki, həmin şəxslər Moskvanın şimalında yerləşən fastfud mağazalarından birinin məhsullarını yeyiblər”, - Rospotrebnadzor-dan bildirilib.

Rospotrebnadzor (Rusiyada qida təhlükəsizliyinə nəzarət edən qurum) paytaxtın şimalında yerləşən “Bistro-24” kafesində insanların şaurma və manqalda toyuq əti yedikdən sonra zəhərləndiyinə aydınlıq gətirib. Ekspertlər çoxsaylı qanun pozuntuları aşkar ediblər.

Məlum olub ki, müəssisədə kifayət qədər soyuducu yoxdur və yemək bişirmək üçün mənşəyi bilinməyən məhsullardan istifadə edirlər. Ümumilikdə 180 kiloqramdan çox belə məhsul satışdan çıxarılıb. İşçilərin tibbi kitabçası və tibbi müayinədən keçmək barədə məlumat yoxdur. İdarə kafenin fəaliyyətinə müvəqqəti qadağa qoyub, müəssisə möhürlənib.