Prokuror Bəxtiyar Hacıyevə iki il həbs istədi

Mayın 10-da Gəncə Şəhər Nizami rayon Məhkəməsində deputatlığa keçmiş namizəd Bəxtiyar Hacıyevin növbəti məhkəmə prosesi keçirilib.

Bu barədə Lent.az-a B.Hacıyevin vəkili Elçin Namazov məlumat verib. Vəkil bildirib ki, hakim Emin Axundovun sədrliyi ilə keçirilən prosesdə iki vəsatət qaldırıblar, lakin vəsatətlərin heç birini təmin edilməyib: “Vəsatətlərdən biri prosesin videolentə köçürülməsi, digəri isə B.Hacıyevin haqqındakı həbs-qətimkan tədbirinin dəyişdirilməsi ilə bağlı idi. Hər iki vəsatət təmin olunmadığından biz müdafiə tərəfi olaraq, prosesdən imtina etdik. Sonra isə dövlət ittihamçısı çıxış etdi”.

Dövlət ittihamçısı B.Hacıyevin 2 il müddətinə azadlıqdan məhrum edilməsini istəyib. Növbəti proses mayın 11-də keçiriləcək. Vəkil onu da bildirib ki, sabahkı prosesdə Bəxtiyar Hacıyevə hökm oxunacaq.

Qeyd edək ki, Bəxtiyar Hacıyev Cinayət Məcəlləsinin 321.1-ci (hərbi xidmət keçməkdən boyun qaçırma) maddəsi ilə ittiham olunur. Martın 4-də barəsində 1 aylıq həbs qərarı verilib.

Anar