Hökmə etiraz edən təqsirləndirilən şəxs başını barmaqlıqlara çırpdı

Oktyabrın 22-də Ağır Cinayətlərə Dair İşlər üzrə Məhkəmədə hədə qorxu yolu ilə quldurluq edən Cəlilabad rayon sakininə hökm oxunub.

Lent.az-ın məlumatına görə, hakim Əfqan Hacıyevin sədrliyi ilə keçirilən prosesdə təqsirləndirilən Bəhlul Yaqubov 10 il müddətinə azadlıqdan məhrum edilib.

Qeyd edək ki, hökmə qərara etiraz əlaməti olaraq, B.Yaqubov başını dəmir barmaqlıqlara çırpıb. Bunun nəticəsində onun sifəti al-qana boyanıb.

İttihama görə, 2009-cu ilin fevral ayında axşam saatlarında Bakıda tikintilərin birində fəhləlik edən B.Yaqubov Sabunçu rayonu ərazisində 34 yaşlı Sevinc Qələmdarovanı bıçaqla hədələyərək içərisində pul, mobil telefon və şəxsi sənədlər olan çantasını ondan alıb. Əməliyyat-axtarış tədbirləri nəticəsində S.Qələndərovaya qarşı quldurluq edən 24 yaşlı Bəhlul Yaqubov tutulub.

Təqsirləndirilən şəxs Azərbaycan Respublikası Cinayət Məcəlləsinin 181.1-ci (quldurluq, yəni özgənin əmlakını ələ keçirmə məqsədi ilə hücuma məruz qalmış şəxsin həyatı və ya sağlamlığı üçün təhlükəli zorakılıqla və ya belə zorakılıq tətbiq ediləcəyi hədəsi ilə bağlı olan basqın) və 181.2.5-ci (silah və ya silah qismində istifadə edilən əşyalar tətbiq edilməklə törədildikdə) maddələri ilə təqsirli bilinib.

Fərid Əkbərov