Paytaxtda baş verən qanlı olayın təfsilatları bəlli olub

Yeznə-qayının Şəhidlər Xiyabanındakı “duel”i qonqalıqdakı mübahisədən başlayıb

Avqustun 18-də saat 21:30 radələrində Bakının Bakıxanov qəsəbəsində atışma olub.

Sabünçü rayon 13-cü polis bölməsinin rəis müavini, polis kapitanı Ramil Cəbiyevin Lent.az-a verdiyi məlumata görə, yeznə-qayın olan Zəngilan rayonunun Ağalı kənd sakinləri Mövsümov Ramiq Rafiq oğlu ilə Balakişiyev Etibar Ramazan oğlu ikincinin Bakıxanov qəsəbəsi Əhməd Ağayev küçəsindəki evində ailəvi yeyib-içiblər.

Sonradan sərxoş vəziyyətdə olan bu iki şəxs arasında mübahisə düşüb. Sonra Ramiq oradan çıxaraq, kirayə yaşadığı Yavər Əliyev 3. ünvanında yerləşən evə gedib. Yaşadığı evdə qanunsuz saxladığı “Makarov” tipli tapançanı götürərək, Etibarı Bakıxanov qəsəbəsindəki Şəhidlər Xiyabanına çağırıb.

Ramiq Etibarın sinə nahiyəsinə 2 güllə atıb. Yaxın məsafə olduğu üçün Etibar Ramiqin əlində tapançanı alıb və Ramiqin boğaz nahiyəsinə 2 dəfə atəş açaraq onu öldürüb.

Hadisə şahidlərinin çağırdığı təcili tibbi yaprdım maşınıyla Etibar 3 saylı şəhər klinik xəstəxanasına aparılıb. Üzərində əməliyyat keçirilən Etibarın vəziyyəti ağır olaraq qalır.

Faktla bağlı cinayət işi açılıb, araşdırma aparılır.