“Xəzər Lənkəran”ın yeni baş məşqçisi sabah açıqlanacaq

Bu haqda Lent.az-a klubun mətbuat katibi Yalçın Əliyev məlumat verib.

O bildirib ki, sabah Bakıya gələcək mütəxəssislə rəsmi müqavilə imzalanacaq. Klub rəsmisi yeni baş məşqçinin ispaniyalı olacağını təsdiqləsə də, adını açıqlamayıb: “Bizim siyahımızda 10-dan çox baş məşqçinin adı var idi. Onlardan 5-i ispaniyalı, bir neçəsi türkiyəli, eləcə də rumıniyalı və ukraynalı idilər. Artıq seçimimizi konkretləşdirmişik. Yeni baş məşqçimiz ispaniyalıdır. O, mətbuatda iddia olunduğu kimi, Eysebio Sakristan Mena deyil. Rəhbərliyimiz hələlik mənə yeni baş məşqçimizin adını açıqlamağım barədə bir söz deməyib. Amma sabah hər kəs bu barədə məlumatlı olacaq”.

Əliyev baş məşqçi təyinatında “Xəzər Lənkəran”ın ispaniyalı fiziki hazırlıq üzrə məşqçisi Erik Kapillanın vasitəçilik etməsinə dair ehtimalları nə təsdiq, nə də təkzib edib. Onun sözlərinə görə, baş məşqçi postuna namizədlər kluba agentlər və ya elə özlərinin göndərdiyi CV-lər vasitəsilə irəli sürülüb. Yeni baş məşqçinin məhz Kapilla tərəfindən irəli sürülməsi də istisna deyil: “Açığı, mən bu barədə dəqiq məlumata malik deyiləm”.

Digər tərəfdən, ispaniyalı baş məşqçinin “Xəzər Lənkəran”da hazırkı məşqçilər Kapilla və Emin Quliyevlə birgə işləyəcəyi gözlənilir. Bununla belə, onun özü ilə yeni köməkçi-məşqçi gətirməsi də mümkündür.

“Qeyd edək ki, “Xəzər Lənkəran”ın baş məşqçi postu Yunis Hüseynovun oktyabrın 31-də istefaya göndərilməsindən sonra boşalıb.

Elşən MƏMMƏDOV