Son 4 ildə 1169 polis cəzalandırılıb

APA-nın xəbərinə görə, bunu daxili işlər nazirinin müavini, general-leytenant Oruc Zalov ATƏT və Mətbuat Şurasının təşkilatçılığı ilə keçirilən “İctimai nümayişlər zamanı jurnalistlərin təhlükəsizliyi” mövzusunda seminarda bildirib. Nazir müavini qeyd edib ki, DİN tərəfindən orqan və hissələrdə qanunçuluğun vəziyyəti mütəmadi olaraq təhlil edilir, ümumiləşdirilir, hüquqazidd hərəkətlərə, polisin adına ləkə gətirən hallara yol verən əməkdaşlara qarşı daxili işlər orqanlarında xidmətdən xaric edilməyə, hətta cinayət məsuliyyətinə cəlb olunmağadək prinsipial ölçülər götürülməsi təmin olunur: “Daxili İşlər Nazirliyinin rəhbərliyi hər cür neqativ təzahürlərə qarşı mübarizə sahəsində öz işini böyük əzmlə davam etdirir və hər belə fakt üzrə qanunla müəyyən edilmiş ən ciddi tədbirlərin görülməsində maraqlıdır. Bununla belə, həyata keçirilən bütün zəruri tədbirlərə baxmayaraq, ayrı-ayrı əməkdaşların xidməti fəaliyyətində müxtəlif qanun pozuntularına, nöqsan və çatışmazlıqlara da rast gəlinir. Belə ki, son 4 ildə və cari ilin 9 ayı ərzində vətəndaşlarla kobud rəftar, əsassız gətirmə, saxlama, məsuliyyətə cəlb etmə, qanunsuz axtarış aparma, proses iştirakçıları haqqında müxtəlif hüquqpozmalara, bir sözlə vətəndaş hüquqlarını pozduqlarına görə 1169 nəfər əməkdaş cəzalandırılıb, onlardan 86 nəfəri Daxili İşlər Orqanlarından xaric edilib, 90 nəfəri tutduğu vəzifədən azad olunub, 18-i isə cinayət məsuliyyətinə cəlb edilib”.