Nazir: Trampın fərmanı girişə qadağanı nəzərdə tutmur

ABŞ prezidenti Donald Trampın miqrasiyaya dair fərmanı heç də müsəlmanların ABŞ-a girişinə qadağanı nəzərdə tutmur. APA-nın “RİA Novosti”yə istinadən verdiyi xəbərə görə, bu barədə ABŞ-ın daxili təhlükəsizlik naziri Con Ketli bildirib.

“Bu qadağa deyil, mən bir daha təkrarlayıram, bu müsəlmanlara qadağanı nəzərdə tutmur”, - deyə Kelli bildirib.

Onun sözlərinə görə, fərman həmçinin müsəlman ölkələrin vətəndaşlarının ölkəyə girişinə qadağanı nəzərdə tutmur, söhbət yalnız 90 günlük məhdudiyyətdən gedir. Miqrasiya sistemindəki vəziyyətin araşdırılmasına 30 gün gedəcək. “Biz təhlükəsizlik tələblərimizə uyğunlaşması üçün xarici tərəfdaşlarımıza 60 gün vaxt verəcəyik”, - deyə Ketli bildirərək, fərmanın ədalətli və peşəkarcasına icra ediləcəyini qeyd edib.

Qeyd edək ki, D. Tramp ötən həftə İraq, İran, Suriya, Sudan, Yəmən. Liviya və Somali vətəndaşlarının 90 gün ərzində ABŞ-a daxil olmasının qadağan edilməsi barədə fərman imzalayıb. Bundan əlavə, D. Tramp qaçqınların ABŞ-da yerləşdirilməsi barədə proqramı 120 gün müddətində dayandırıb.