Gürcüstanda “Avropa həftəsi”

Bu gün Gürcüstan paytaxtında “Avropa həftəsi” başlayıb. APA-nın Gürcüstan bürosunun məlumatına görə, keçiriləcək tədbir münasibətilə Avropa nümayəndələri ilə Gürcüstanın dövlət rəsmiləri arasında görüş keçirilib. Tədbiri Avropa və avroatlantik inteqrasiya naziri Aleksi Petriaşvili açaraq, Gürcüstanda keçirilən “Avropa həftəsi”ni yüksək qiymətləndirib, həftə ərzində təşkil olunan tədbirlər, görüşlər haqqında ətraflı məlumat verib. Sonra tədbirdə Gürcüstanın elm və təhsil nazirinin müavini David Zurabişvili, Avropa Birliyinin Gürcüstandakı nümayəndəliyinin rəhbəri, səfir Filipp Dimitrov çıxış ediblər.

“Avropa həftəsi” AB-nin və NATO-nun informasiya Mərkəzi, eyni zamanda Gürcüstanın Avropa və Avropa strukturları məsələləri üzrə dövlət nazirliyi tərəfindən dəstəklənir.

Mayın 7-11-ə qədər keçiriləcək tədbirlərdə hökumət və qeyri hökumət sektorları, diplomatik struktur nümayəndələri, məktəblilər, tələbələr və ictimaiyyət nümayəndələri iştirak edəcəklər.

Qeyd edək ki, mayın 9-da Avropa Birliyinin təsis olunmasında 52 il ötür. “Avropa həftəsi” Avropa Gününə hazırlıq məqsədi daşıyır.