Belqradda AXC-nin yaradılmasının 95-ci ildönümü qeyd edilib

Serbiyanın paytaxtı Belqrad şəhərindəki “Həyat Regency” otelində mayın 28-də Azərbaycan Respublikasının Milli Bayramı-Respublika Gününə həsr olunmuş rəsmi qəbul keçirilib.

Azərbaycanın Serbiyadakı səfirliyindən Lent.az-a verilən məlumata görə, tədbirdə Serbiya prezidenti Tomislav Nikoliç və xanımı Draqitsa Nikoliç, baş nazirin müavini və digər rəsmilər, habelə Belqradda fəaliyyət göstərən Serbiya-Azərbaycan ticarət-iqtisadi Palatasının və Balkan ölkələri üzrə Azərbaycan Mədəniyyət Mərkəzinin rəhbərliyi və üzvləri, Serbiyada yaşayan, çalışan və təhsil alan azərbaycanlılar iştirak ediblər.

Azərbaycanın Serbiyadakı səfiri Eldar Həsənov 95 il bundan əvvəl, 28 may 1918-ci ildə tarixi İstiqlal Bəyannaməsinin qəbul edilməsi ilə Şərqdə, bütün müsəlman dünyasında ilk parlamentli demokratik respublika olan Azərbaycan Xalq Cümhuriyyətinin yaradılmasından və onun tarixindən bəhs edib.

Daha sonra Azərbaycan və Serbiya arasında təşəkkül tapmış hərtərəfli əlaqələrə toxunan Eldar Həsənov Azərbaycan-Serbiya münasibətlərinin dinamik şəkildə, yüksələn xətlə inkişaf edərək, qısa müddət ərzində, strateji tərəfdaşlıq səviyyəsinə yüksəldiyini vurğulamış, əlaqələrin bu səviyyəyə yüksəlməsində iki ölkənin dövlət başçılarının qarşılıqlı səfərlərinin böyük rol oynadığını nəzərə çatdırıb.

Tədbir çərçivəsində Azərbaycanın Serbiyadakı səfirliyinin və Balkanlarda yaşayan həmvətənlərimizin təşəbbüsü ilə bu günlərdə baş nazirinin müavini, tanınmış yazıçı Elçin Əfəndiyevin serb dilinə tərcümə olunaraq Belqrad şəhərində nəşr etdirilmiş “Ölüm hökmü” kitabının təqdimat mərasimi də keçirilib. Elçin Əfəndiyev çıxış edərək prezident İlham Əliyevin salamlarını Serbiya prezidentinə və serb xalqına çatdırıb.

Tədbirdə Serbiya prezidenti Tomislav Nikoliç çıxış edərək Azərbaycan xalqını və dövlətini 28 May – Respublika Günü münasibəti ilə təbrik edib. O, Serbiya dövləti və rəhbərliyinin Azərbaycanla münasibətlərə müstəsna önəm verdiyini, dövlət başçılarının qarşılıqlı səfərlərinin ölkələrimiz arasında ikitərəfli və çoxtərəfli əməkdaşlığın dərinləşdirilməsinə zəmin yaratdığını, Azərbaycanla Serbiya arasında müxtəlif sahələrdə əməkdaşlığın genişləndirilməsi və mümkün olduqca daha geniş sahələri əhatə etmək üçün qarşılıqlı istəyin mövcudluğunu vurğulayıb.

Tədbir Azərbaycanın tarixi, mədəniyyəti, ölkəmizin gündəlik həyatını, müstəqilliyin bərpasından sonra əldə edilmiş uğurları əks etdirən film və serb musiqiçilərinin ifasında milli musiqimizin müşayiəti ilə davam edib.