Ağıllı bıçaqlar da gəldi

Cənubi Koreyanın “Samsung” şirkəti smartfon funksiyalarına malik “Galaxy Blade edge” adlı dünyanın ilk “ağıllı” bıçağını təqdim edib.

Lent.az-ın “musavat.com”-a istinadən məlumatına görə, qurğu “Galaxy S6” smartfonunun bütün özəlliklərinə (“Android” əməliyyat sistemi, “TouchWiz” istifadəçi interfeysi və əla kamera) malikdir. Almaz örtüklü çox iti keramika bıçaq “Galaxy” seriyasının yeni nümayəndəsini mətbəxdə əvəzolunmaz köməkçiyə çevirir. Bundan başqa, sözügedən bıçaq qatlanan qulpa malikdir və alıcının istəyi ilə zeytun ağacı, keramika, paslanmayan poladdan hazırlana bilər.

“Samsung Knox” texnologiyası sayəsində “Blade edge”dən istifadə həmişə təhlükəsizdir. Barmaqların müəyyən edilməsi mexanizmi bıçaq vasitəsilə kəsilmələrin qarşısını alır, antivirus müdafiəsi isə istifadəçiləri inqrediyentlərdə arzuolunmaz mikroblar haqda xəbərdar edir. Bundan əlavə, “Galaxy Blade” suya qarşı müdafiəyə malikdir və yanğın təhlükəsizliyi tələblərinə cavab verir. Komplektə daxil olan stilus öz əsas funksiyasından başqa termometr və ya şup kimi istifadə oluna bilər.