Kadırovun oğlu mükafatlandırma mərasiminə qızıl tapança ilə gəldi

Çeçenistan rəhbərinin oğlu Adam Kadırov Kabardin-Balkarın rəhbəri Kazbek Kokovun mükafatlandırma mərasiminə qızıl tapança ilə gəlib.

Lent.az xarici mediaya istinadla bildirir ki, görüntülərdə Kadırovun 15 yaşlı oğlu Kokovdan Kabardin-Balkar Respublikasına xidmətlərinə görə ordenini alır, koburunda silah görünür.

Əvvəllər xəbər verildiyi kimi, iclasda iştirak edən Dövlət Dumasının deputatı Adam Delimxanov Adam Kadırovu hafiz - müsəlmanların müqəddəs “Qurani-Kərim”in qoruyucusu adlandırıb. Bununla bağlı deputat “Quran”ı yandırmaqda şübhəli bilinən Nikita Juravelin kiçik Kadırov tərəfindən döyülməsinə toxunub. "Bu şeytanı görəndə heç kim müqavimət göstərə bilməzdi", -Delimxanov Kadırovun oğlunun hərəkətini belə şərh edib.

Son bir ayda Adam Kadırov beş mükafat alıb - bundan əvvəl Qaraçay-Çərkəz Respublikasının başçısı Rəşid Temrezov ona respublika qarşısında xidmətlərinə görə orden təqdim edib. Həmin gün Qaraçay-Çərkəz Respublikasının müftisi İsmayıl-Hacı Berdiyev kiçik Kadırova 1-ci dərəcəli “Ümmət qarşısında xidmətlərinə görə” ordenini təqdim edib. Oktyabrın sonunda Tatarıstan rəhbəri Rüstəm Minnixanov Kadırovun oğlunu respublikanın ikinci ən mühüm dövlət mükafatı olan “Duslık” ordeni ilə təltif edib. Oktyabrın əvvəlində Adam Kadırov Çeçenistan Qəhrəmanı adını alıb.

Adam Kadırov Çeçenistan rəhbərinin sentyabrın sonunda oğlunun “Quran”ı yandıran şəxsi döydüyü videonu dərc etdikdən sonra mükafat alıb.