Fransada Michelin bələdçisində yer alan restoranların bəzi müştəriləri məkandan yalnız xoş təəssüratlarla ayrılmırlar. Son vaxtlar restoranlardan çəngəl-bıçaq dəstləri, dibçəklər, hətta tualet kağızı tutacaqlarının oğurlanması halları artıb.
Lent.az xarici mediaya istinadən xəbər verir ki, restoran sahibləri və aşpazların sözlərinə görə, yoxa çıxan əşyalar onlara hər il bir neçə yüz avrodan bir neçə min avroyadək zərər vurur.
Auvergne-Rhône-Alpes regionunda yerləşən Michelin ulduzlu “LEmulsion” restoranının və “Bib Gourmand” nişanına layiq görülmüş “Lo Fieu” bistosunun həmsahibi Romen Yuber bildirib ki, müştərilərin oğurladığı əşyalar barədə ayrıca kitab yazmaq olar.
Onun sözlərinə görə, restoran Michelin ulduzu almamışdan əvvəl belə müştərilərdən biri tualet kağızı tutacağını oğurlayıb. Həmin şəxs əşyanı sadəcə götürməyib, vintləri və dübelləri də sökərək özü ilə aparıb. Nəticədə divarda yalnız zədələnmiş suvaq qalıb.
Ən çox hansı əşyalar oğurlanır?
Restoran sahiblərinin sözlərinə görə, müştərilərin ən çox maraq göstərdiyi “suvenirlər” arasında çəngəl-bıçaq dəstləri və bahalı bıçaqlar var.
“Lo Fieu” bistosunda qoz ağacından hazırlanmış dəstəyə malik “Opinel” markalı bıçaqlar xüsusilə tez-tez oğurlanır. Sahiblər bıçaqları qatlayıb cibdə gizlətməyin qarşısını almaq üçün onların üzərinə xüsusi halqa bərkidiblər. Buna baxmayaraq, ilk il ərzində restorandakı 90 bıçaqdan azı 40-ı oğurlanıb.
Dekorativ əşyalar da müştərilərin diqqətindən yayınmır. Restoranların qadınlar üçün nəzərdə tutulmuş sanitar qovşaqlarında yerləşdirilən bahalı şamlar və əl kremləri mütəmadi olaraq yoxa çıxır. Hətta bəzi restoranlar kremləri hər iki həftədən bir yeniləmək məcburiyyətində qaldıqları üçün onları dispenserlərlə əvəz ediblər.
İzer bölgəsində yerləşən restoranlardan birində isə müştəri dibçəyin torpağını unitaza boşaldaraq qabın özünü götürüb aparıb.
Başqa bir hadisədə Niderland vətəndaşı su dolçasını köynəyinin altında gizlədərək restorandan çıxarmağa çalışıb.
Beşulduzlu hotellərdə də vəziyyət fərqli deyil. Məlumata görə, bəzi hotellərdən hər il təxminən 100 hamam xalatı yoxa çıxır. Bir mövsümdə isə hovuz üçün xüsusi seçilmiş 150 dəsmalın hamısı yay aylarında oğurlanıb.
Restoran sahiblərinin 94 faizi oğurluqla üzləşib
“bouillante.com” kulinariya saytının 500 restoran sahibi arasında keçirdiyi sorğuya əsasən, respondentlərin 94 faizi ən azı bir dəfə müştəri oğurluğu ilə üzləşib.
Araşdırma göstərib ki, restoran nə qədər bahalı və prestijli olarsa, müştərilərin oradan müxtəlif əşyaları götürüb aparması ehtimalı da bir o qədər yüksəlir.
Restoranlar oğurluğa qarşı mübarizə aparır
Parisin 17-ci rayonunda yerləşən Michelin ulduzlu “Agape” restoranının sahibi Loran Laper bildirib ki, artıq 18 ildir oğurluq edən müştərilərlə mübarizə aparır.
Restoranda salfetlər üçün gümüş üzüklərdən istifadə olunur. Eyni zamanda bıçaq altlığı funksiyası daşıyan və dizayner Andre Putman tərəfindən “Christofle” üçün hazırlanan bu dəstin qiyməti təxminən 200 avrodur.
Ofisiantlar desert təqdim edilməzdən əvvəl həmin üzükləri masadan yığaraq hamısının yerində olub-olmadığını yoxlayırlar.
Restoran sahibinin sözlərinə görə, bəzi hallarda üzüklər müştərilərin çantalarında “təsadüfən” peyda olur.
Laper belə vəziyyətlər üçün effektiv üsul tapdıqlarını deyib. Əşya yoxa çıxanda onun qiyməti hesaba əlavə olunur. Bundan sonra isə itkin əşya adətən dərhal “tapılır”.
210 avroluq bıçağı oğurladı, kameraya düşdü
Auvergne bölgəsindəki Michelin ulduzlu “Origines” restoranının meneceri Adrian Deskul isə daha diqqətçəkən hadisə ilə üzləşib.
Bir qadın müştəri masasından qalxarkən qonşuluqdakı boş masanın üzərindəki dizayner bıçağını götürüb.
Restoran əməkdaşları qadından bıçağı geri qaytarmağı xahiş etdikdə o, buna etiraz edib və ittihamları qəbul etməyib.
Lakin təhlükəsizlik kameralarının görüntüləri nümayiş etdiriləndən sonra qadın bıçağı götürdüyünü etiraf etmək məcburiyyətində qalıb.
Restoran rəhbərliyi isə hadisəyə güzəşt etməyib və polisə müraciət etmək qərarına gəlib. Bildirilib ki, restoranda istifadə olunan həmin dizayner bıçaqlarının hər birinin qiyməti 210 avrodur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
