Bu ölkədə dövlət qulluqçularının mükafatlarına Türkiyə PUA-ları alındı

Qırğızıstan hakimiyyəti dövlət qulluqçularının rüblük mükafatlarını Türkiyə pilotsuz təyyarələrinin alınmasına xərcləyib.

Lent.az bildirir ki, “Sputnik Qırğızıstan”ın xəbərinə görə, bunu prezidentin mətbuat xidmətinin rəhbəri Dayırbek Orunbekov deyib.

Onun sözlərinə görə, Tacikistanla sərhəddə münaqişədən sonra respublika rəhbərliyi ordunun təhlükəsizliyinə və silahlanmasına xüsusi diqqət yetirmək qərarına gəlib. Bunun üçün mükafatlar üçün nəzərdə tutulan pulların ayrılması qərara alınıb.

“Müdafiə üçün Qırğızıstana görünməmiş müasir pilotsuz uçuş aparatları “Bayraktar”, “Aksunqur”, “Akıncı” və “Anka” gətirilib. Demək olar ki, dövlət qulluqçuları müvəqqəti olaraq mükafat almayaraq ölkənin təhlükəsizliyinin möhkəmləndirilməsinə az da olsa töhfə verirlər”, - Orunbekov bildirib.

O vurğulayıb ki, əgər dövlət özünü qoruya bilməsə, rüblük mükafatlar “dəyərsiz olacaq”. Eyni zamanda, Orunbekov qeyd edib ki, dövlət qulluqçularının 13-cü maaşı qalıb - onlar bunu ilin sonunda alacaqlar.