Antalya cazibəsi erməniləri bir-birinə vurdu

Turizm cənnətinə erməni axını ölkədə ciddi narazılıqla qarşılanıb

Türkiyənin turizm bölgələrinə erməni turistləri axın edir.

Lent.az-ın Türkiyənin “Sabah” qəzetinə istinadən yaydığı məlumata görə, bu sırada Antalya xüsusi yer tutur.

İrəvandakı turizm şirkətləri öncəki illərlə müqayisədə Türkiyəyə turist kimi getmək istəyənlərin sayının iki dəfə artdığını bildirib.

Antalya və İrəvan arasında həftədə 4 dəfə həyata keçirilən təyyarə uçuşları turistləri daşımaq üçün yetmir.

“Sabah” qəzeti yazır ki, prezident Serj Sərkisyanın “sərhədlər açılmasa, futbol yığmalarının Türkiyədə keçiriləcək görüşünə getməyəcəyəm” bəyanatını verməsindən sonra Ermənistandakı bəzi qruplar turist səfərlərinə etiraz bildirməyə başlayıb.

Ermənistan İnqilab Federasiyasının gənclik qolu bu istiqamətdə xüsusi fəallıq göstərir. Onlar “Antalyaya yox!” kampaniyası keçirirlər. Əsas iddiaları da budur ki, erməni turistlərin Antalyada xərclədikləri pullar Türkiyə ordusunun silahlanmasına xərclənir.

Bəzi ermənilər isə bunu “türklər bizə xidmət edirlər” kimi qiymətləndirirlər.