Türkiyədə 50 nüvə bombası var

Nüvə silahları ilə bağlı sensasion məlumatlar açıqlanıb

Belçika Senatında nüvə silahının yayılmasının qadağan edilməsiylə bağlı təqdim olunan qanun layihəsində bu vaxta qədər məlum olmayan, sensasiya doğuracaq faktlar yer alıb.

Lent.az-ın Türkiyənin “Vətən” qəzetinə istinadən yaydığı xəbərə görə, qanun layihəsində Avropadakı nüvə silahları ilə əlaqədar məlumatlar verilib.

Qanun layihəsi Amerika Elm Adamları Federasiyasının hesabatına əsaslanıb. Amerika Elm Adamları Federasiyasının hesabatında qeyd olunub ki, Avropadakı ABŞ hərbi bazalarında 240 nüvə bombası var.

Sosialist Filippe Mahouksun hazırladığı layihədə Türkiyə Avropada nüvə silahlarının olduğu ilk beş ölkə sırasında göstərilib. Sənəddə yazılır ki, ABŞ İkinci Dünya Müharibəsindən sonra ABŞ Avropada yerləşdirdiyi 9 min nüvə bombasının 97 faizindən çoxunu çıxarıb. Ancaq Fransa və İngiltərədə onların öz istehsalları olan nüvə silahları olduğu kimi qalır, Belçika, Almaniya, İtaliya, Hollandiya və Türkiyədəki NATO bazalarında da nüvə bombaları saxlanmaqdadır.

Amerika Elm Adamları Federasiyasının hesabatında ABŞ-ın Türkiyədəki “İncirlik” hərbi bazasında ən azı 50 nüvə bombası olduğu bildirilib. İtaliyada 70-90, Belçika, Almaniya və Hollandiyada isə 10-20 aralığında nüvə bombası olduğu vurğulanıb.

Ramiz