Turizm üçün ən təhlükəsiz ölkələr

Amerikanın “Forbes Traveler” jurnalı turistlər üçün dünyanın ən təhlükəsiz ölkələrinin reytinqini tərtib edib. Lent.az-ın məlumatına görə, birinci üç yeri İsveçrə, Yeni Zelandiya və Sinqapur bölüşüblər.

Amerikalı ekspertlər araşdırma zamanı BMT-nin və ABŞ Dövlət Departamentinin məlumatlarını nəzərə alıblar. Bu zaman xarici vətəndaşlara qarşı cinayətlər, təbii fəlakətlər, sosial, siyasi təlatümlər və terrorçuluq faktları nəzərdən keçirilib.

İsveçrədə dünyanın üç ən təhlükəsiz şəhərləri yerləşir: Bern, Sürix və Cenevrə. Yeni Zelandiya sakinləri özlərinin sakit təbiətləri ilə seçilirlər – bu ölkə ağır cinayətlərin səviyyəsinə görə sonuncu yerdədir. Sinqapurda isə turistlərin təhlükəsizliyi xüsusi xidmət orqanları səviyyəsində diqqətlə qorunur.

Reytinqə İrlandiya, İslandiya, Kipr, BƏƏ və Butan kimi ölkələr də daxil olub.

“Forbes” turistlər üçün ən təhlükəli ölkələrin də siyahısını dərc edib. Gözlənildiyi kimi, bu siyahıya İraq və Əfqanıstan başçılıq edirlər.