“Donuz qripi”nin coğrafiyası genişlənir

Ötən şənbə və bazar daha 6 ölkədə A(H1N1) virusu qeydə alınıb

İki gün ərzində “Donuz qripi” - A(H1N1) virusunun qeydə alındığı ölkələrin sayı 33-dən 39-a qalxıb. Həmin ölkələrdə 8480 laborator təsdiq olunmuş A(H1N1) qrip hadisəsi qeydə alınıb.
Bu barədə Lent.az-a Səhiyyə Nazirliyinin mətbuat xidmətindən bildiriblər. Ümumdünya Səhiyyə Təşkilatının məlumatına əsasən, 17 may tarixinə dünyanın Meksika, ABŞ, Kanada, Kosta-Rika, Argentina, Avstraliya, Avstriya, Belçika, Braziliya, Çin (Honq Konq), Kolumbiya, Kuba, Danimarka, Ekvador, Salvador, Finlandiya, Fransa, Almaniya, Qvatemala, Hindistan, İrlandiya, İsrail, İtaliya, Yaponiya, Malayziya, Niderland, Yeni Zelandiya, Norveç, Panama, Peru, Polşa, Portuqaliya, Koreya, İspaniya, İsveç, İsveçrə, Tailand, Türkiyə və Birləşmiş Krallıqda 8480 laborator təsdiq olunmuş A(H1N1) qrip hadisəsi qeydə alınıb. Bunlardan Meksikada 66, ABŞ-da 4, Kanada və Kosta-Rikada hərəsində 1 hadisə ölümlə nəticələnib.
Xatırladaq ki, Ümumdünya Səhiyyə Təşkilatının mayın 15-də yaydığı məlumatda həmin günədək bu virusa tutulan ölkələrin sayı 33 göstərilmişdi. Həmin siyahıda Türkiyənin, Ekvador, Peru, Belçika, Hindistan və Malayziyanın adı yox idi.
Elxan SALAHOV