Avstraliyada 93 yaşlı həkim Con Levin 37 yaşlı həyat yoldaşı Yanin Lu ilə birlikdə oğul övladı sahibi olub. Yaş fərqinə baxmayaraq, cütlük ikinci uşaq dünyaya gətirməyi planlaşdırır.
Lent.az xarici mediaya istinadla xəbər verir ki, cütlük koronavirus pandemiyası dövründə övlad sahibi olmaq qərarına gəlib. 2024-cü ilin fevral ayında Levin və həyat yoldaşı Yanin Lunun oğlu Qabbi dünyaya gəlib.
93 yaşında ata – “Hədəfim oğlumun 21 yaşını görməkdir”
Melburn şəhərində yaşayan ailə həkimi Con Levin sağlam qocalma üzrə mütəxəssisdir. O bildirib ki, oğlunun doğulması inanılmaz bir hadisə olub, çünki bu proses donor sperması və süni mayalanma (IVF) yolu ilə baş tutub. Levin, yaşına baxmayaraq, övladının uşaqlıq illərində onun yanında olmağı planlaşdırır:
“Əlbəttə, onun 21 yaşını qeyd edəcəyim günə qədər yanında olmaq mənim məqsədimdir”, – Levin qeyd edib.
İkinci uşağı planlaşdırırlar
Qabbi hələ körpə olsa da, Levin və Lu artıq ikinci uşaq sahibi olmaq üçün süni mayalanma prosesinə yenidən başlayıblar.
Tanışlıq hekayəsi: dil dərsindən ailəyə uzanan sevgi
Levinin ilk həyat yoldaşı Veronika ilə 57 illik evliliyindən üç övladı olub. O, 2013-cü ildə həyat yoldaşını itirib, övladlarından biri isə 65 yaşında vəfat edib.
Daha sonra Levin Çin dili öyrənməyə qərar verib və çin dili müəllimi olan Yanin Lu ilə tanış olub. Cütlük 2014-cü ildə Las-Veqasda evlənib.
Maddi deyil, sevgi üçün evlənib
Yanin Lu bildirib ki, pandemiya dövründə karantin tətbiq olunduqdan sonra analıq barədə düşünməyə başlayıb. O, ərinin yaşına görə münasibətlərinə yönələn mənfi fikirləri rədd edərək deyib: “Conla tanış olduğum vaxt o iflas etmişdi. Mən var-dövlət üçün deyil, sevgi üçün evləndim”.
O, həmçinin əlavə edib ki, çox vaxt oğlunu ərinin nəvəsi və ya nəticəsi hesab edirlər.
Uzunömürlülük sirri: sağlam həyat tərzi
Dr. Levin artıq 20 ilə yaxındır ki, yaşlanmaya qarşı mübarizə ilə bağlı məsləhətlər verir. O, 30 il ərzində özünə böyümə hormonu vurub, idmandan, vegetarian qidalanmadan və səhər yeməyindən imtina edərək nizamlı həyat sürüb.
Levin spirtli içki və siqaretdən uzaq durduğunu deyərək sağlamlığını bu həyat tərzinə borclu olduğunu vurğulayıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
