974
13:06
04 Fevral 2020

Həcc ziyarətinə gedənlər peyvənd olunacaq

Həcc ziyarətinə getmək istəyənlər üçün sənəd qəbulu davam edir.

Qafqaz Müsəlmanları İdarəsindən (QMİ) Lent.az -a verilən məlumata görə, artıq 40-a yaxın insan öz sənədlərini təqdim edib.

QMİ yeni yayılan ölümcül virusla bağlı Səudiyyə Ərəbistanı tərəfindən Həcc ziyarətinə getməyə hazırlaşanlarla bağlı hər hansı tədbir görülüb-görülməyəcəyinə də münasibət bildirib.

İdarədən verilən məlumata görə, bununla bağlı hələ ki açıqlama yoxdur: “Ziyarətə hazırlaşan hər bir zəvvar getməzdən öncə yoluxucu xəstəliklərə qarşı peyvənd olunur. Səudiyyə Ərəbistanı gələn zəvvarlardan peyvənd olunma ilə bağlı sənədi tələb edir. Bu il də ziyarətə az qalmış zəvvarlar peyvənd olunacaq”.

Qeyd edək ki, Həcc ziyarəti üçün Səudiyyə Ərəbistanına gediş-dönüş iyulun 20-dən avqustun 15-dək nəzərdə tutulur. Zəvvarları aparan ilk təyyarənin iyulun 20-də yola düşəcəyi nəzərdə tutulur.

Həcc ziyarətinə sənəd qəbulu yanvarın 24-dən başlayıb.

Sənədlərin qəbulu Ramazan ayının (may ayının sonu) sonuna kimi davam edəcək.

Həcc ziyarətinə 1500 nəfərlik kovata ayrılıb.

Ziyarətin qiyməti isə bir nəfər üçün 4490 dollar müəyyən edilib.