Biri "xalq avtomobilidir", biri heyvan adı - Brend adların əsl mənasını bilirdiniz?

Dünyanın brend avtomobil markalarının – “Mercedes-Benz”, “BMW”, “Toyota”, “Subaru” və digərlərinin adları haradan götürülüb?

Məlumdur ki, dünyanın iri avtomobil istehsalçılarından biri olan qonşu Rusiyada bu adlar əsasən zavodların yerləşdiyi şəhər və vilayət adları ilə bağlıdır. Bəs adlarını çəkdiyimiz və digər məşhur avtomobil brendlərinin adları haradan yaranıb?

Reklam və marketinq sahəsi üzrə ekspert Sabit Məmmədov Lent.az-a açıqlamasında sahibkarların əksəriyyətinin avtomobil markalarına öz adlarını verdiyini və ilk dizaynın da özlərinə məxsus olduğunu bildirib:

“Dünyaca məşhur avtomobil brendlərinin əksəriyyəti sahibkarlarının adlarını daşıyır. Onların ilk dizaynı və bəzi icadları da elə sahibkarların özlərinə məxsus olur. Məsələn, dünyaca məşhur brendlərdən “Mitsubishi”nin mənası "3 almaz" deməkdir. Demək olar ki, hər bir avtomobil həvəskarının sevdiyi “Mercedes-Benz”ə gəlincə, Mercedes qız adıdır. Benz şirkəti quran Karls Benzin adı ilə əlaqədardır.

“Mazda” zərdüştlükdəki Ahura Mazda adından götürülüb. “Hyundai” Koreya dilindən tərcümədə "çağdaş"-"müasir" deməkdir.

ABŞ-ın bahalı avtomobil markalarından olan “Cadillac” Detroit şəhərinin qurucusunun adıdır. “Subaru” yaponca bürc adıdır. “Lexus” latınca qanun mənasını verir. “Volkswagen” xalq avtomobili deməkdir. “Audi” "eşitdim"-"duydum" anlamına gəlir.

Dünyanın ən öndə gedən iki brendindən biri olan “BMW” vilayətin adından götürülüb. Açıqlaması Bavyera Mühərrik Fabrikidir. Yaponiyanın dünyaca məşhur avtomobil markası olan “İnfiniti” adı "ucsuz-bucaqsız" mənasına gəlir. Dünyanın ilk avtomobil brendlərindən olan ABŞ-ın nəhəng “Ford” markası öz adını şirkətin yaradıcısı Henri Fordun adından götürüb.

İngiltərənin məşhur “Land Rover” markasının adının mənası "səyyah" deməkdir. Bu markanın adı yolsuzluğa bağlı olaraq verilib. “Toyota” eyniadlı şəhərin adından götürülüb. “Jaguar” da məlum olduğu kimi, eynidadlı heyvanın adını daşıyır. Avtomobil markaları arasında yeganə olaraq, “Jeep” (Cip)-dir ki, adının mənası bilinmir. Əslində onun da adının “Eugane the Cip” adlı heyvandan gəldiyi ehtimal olunur”.