988
16:11
04 Noyabr 2019

Dilqəm və Şahbaz üçün son mərhələ: "Gecikə bilərik"

Xəbər verdiyimiz kimi, bu gün Prezident Administrasiyasının Hüquq-mühafizə orqanları ilə iş şöbəsinin sektor müdiri, Azərbaycanın Avropa İnsan Hüquqları Məhkəməsindəki daimi nümayəndəsi Çingiz Əsgərov bildirib ki, Azərbaycan hökuməti bir neçə həftə öncə Ermənistanın girov saxladığı Dilqəm Əsgərov və Şahbaz Quliyevlə bağlı mövqeyini Avropa Məhkəməsinə təqdim edib:

“Bu prosesdə sonuncu mərhələdir. Bundan sonra Avropa Məhkəməsi artıq tarix müəyyən etməli və dinləmə keçirilməlidir. Çox güman ki, dinləmə gələn il baş tuta bilər".

Ç.Əsgərov qeyd edib ki, AİHM öz qərarında bu iki şəxsin hüquqlarının pozulmasını müəyyən edəcək və ardınca Ermənistan bu qərarı icra etməli olacaq:

“Ermənistan qəbul olunan qərarı icra etməyə bilər. Amma Avropa Şurasının müvafiq təsir mexanizmləri mövcuddur. Biz də bu mexanizmlərdən istifadə edəcəyik və mütəmadi məsələni qaldıracağıq ki, Ermənistan qərarları icra etsin".

Dilqəm Əsgərovun oğlu Kürdoğlu Əsgərov isə Lent.az -a bildirib ki, prosesin uzanması onu narahat edir:

“Avropa Məhkəməsinə dəfələrlə müraciət edilib, bununla bağlı iş icraata götürülsə də, dəyişiklik baş verməyib. Əslində ümid edirdim ki, atam Dilqəm Əsgərovla Şahbaz Quliyevin işinə qısa müddətdə baxılacaq, ancaq baş verənlər məni yanıldır.

Atamın 60 yaşı var və səhhətində ciddi problemləri var. Atam da, Şahbaz Quliyev də həm yaşlı, həm də xəstədirlər. Onları həkim nəzarətində saxlayırlar. Qorxuram ki, onların səhhətləri ilə bağlı ciddi problemləri yaransın və hər şey üçün gec olsun”.

Şahbaz Quliyevin qardaşı İlham Quliyev isə deyib ki, qardaşı barədə daha çox məlumatları mətbuat vasitəsilə alır:

“Danışıqların gedişinə görə ümid edirəm ki, qardaşım və Dilqəm yaxın müddətdə azad olunacaqlar. Ailə olaraq bununla bağlı şad xəbər alacağımıza ümid edir, gözləyirik”.

Qeyd edək ki, 2014-cü il iyulun 11-də Rusiya vətəndaşı Dilqəm Əsgərov və Azərbaycan vətəndaşları Şahbaz Quliyev və Həsən Həsənov Azərbaycanın işğal altında olan Kəlbəcər rayonunda yaxınlarının məzarlarını ziyarət etmək üçün gediblər. Həmin gün Şaplar kəndində Ermənistan Silahlı Qüvvələri tərəfindən keçirilən əməliyyat zamanı Dilqəm Əsgərov və Şahbaz Quliyevi Kəlbəcərdə girov götürüblər. Həsən Həsənov isə güllələnərək öldürülüb. 2014-ci il oktyabrın 2-də Həsən Həsənovun nəşi qarşı tərəfdən alınıb və oktyabrın 4-də Həsən Həsənov Bakının Binəqədi qəbiristanlığında dəfn edilib.

İşğal altındakı Dağlıq Qarabağda D.Əsgərov və Ş.Quliyev üzərində isə qanunsuz “məhkəmə” qurulub, D. Əsgərov ömürlük, Ş. Quliyev isə 22 il müddətinə azadlıqdan məhrum edilib.