19:42
08 Oktyabr 2019

Operanı almaniyalı dirijor idarə edəcək

Oktyabrın 19-da Azərbaycan Dövlət Akademik Opera və Balet Teatrında C.Puççininin ən populyar əsərlərindən biri “İl Tabarro” operasının tamaşası olacaq.

Lent.az -a teatrdan verilən məlumata görə, ilk quruluşu 1918-ci il dekabrın 14-də Nyu-Yorkun Metropoliten-Opera teatrında verilən tamaşa Azərbaycan Dövlət Akademik Opera və Balet Teatrında 2014-cü ildə almaniyalı rejissor Lüdviq Bauman tərəfindən hazırlanıb.

Tamaşanın musiqi rəhbəri və dirijoru isə Korneliya fon Kerssenbrokdur.

Həmin vaxtdan Teatrın repertuarında yer tutan "İl-Tabarro" operası gözəl səhnə tərtibatı və kostyumları ilə də tamaşaçılarda böyük maraq doğurur.

Azərbaycan Opera və Balet Teatrında oktyabrın 19-na planlaşdırılan tamaşanı idarə etmək üçün yenidən Korneliya fon Kerssenbroku dəvət edilib.

Oktyabrın 19-da oynanılacaq tamaşada əsas rollarda Əməkdar artistlər Afaq Abbasova (Jorjetta), Fərid Əliyev (Luidji), Cahangir Qurbanov (Mikele), Əliəhməd İbrahimov (Tinka), Tural Ağasıyev (Vintitore), solistlər Nina Makarova (Frudjola), Tələt Hüseynov (Talpa) çıxış edəcəklər.

Dİgər xəbərlər